Лондоннинг «Тоттенхэм» клуби ярим ҳимоячиси Хави Симонс жамоа бош мураббийи Роберто Де Дзерби ҳақида ўз фикрларини билдирди.

«Мураббий қандай футбол ўйнамоқчи эканини аллақачон тушуниб етдим. Ростини айтсам, у менталитетимизни дарҳол ўзгартирди, бизга энергия ва янги импульс берди. У ўзим ўйнайдиган позицияда тўп сурган, шунинг учун мени яхши тушунади. У менга эркинлик ва ишонч берди, футболчига айнан шу нарса керак. Агар мураббийдан ишонч ёки қўллаб-қувватлашни ҳис қилмасангиз, ўйнаш қийин. Де Дзерби эса биринчи кундан бошлаб буларнинг барчасини жамоага ва айниқса менга берди», — дея Симонснинг сўзларини келтиради журналист Мэтт Барлоу.

Роберто Де Дзерби жорий йилнинг март ойи охирида «Тоттенхэм»ни бошқарди ва мураккаб турнир вазиятига қарамай, жамоанинг Англия Премьер-лигасидаги ўрнини сақлаб қолишга муваффақ бўлди.