Франция терма жамоаси собиқ ҳужумчиси Тьерри Анри 2026 йилги Жаҳон чемпионати доирасида «уч ранглилар»нинг Испанияга қарши кечган ўйини натижаси ҳақида ўз фикрлари билан ўртоқлашди.
Шимолий Америка мундиалининг ярим финал учрашуви «қизил фурия»нинг 2:0 ҳисобидаги ғалабаси билан якунланди.
«Испанлар тўпни назорат қилишди ва нима учун Европа чемпиони эканликларини исботлашди. Улар анча кучлироқ эди. Яхшироқ ўйнаган жамоа ғалаба қозонди. Агар ўйин бошиданоқ бор кучингиз билан ўйнамасангиз, қийин бўлади», — деди Анри Fox Sports эфирида.
Испания ҳозирча финалдаги рақиби ким бўлишини билмайди. Рақиб 15 июль куни Тошкент вақти билан соат 00:00 да бошланадиган Англия ва Аргентина терма жамоалари ўртасидаги баҳс натижасига кўра аниқланади.
