Италия терма жамоасининг собиқ футболчиси Франческо Тотти миллий жамоанинг кетма-кет учинчи марта Жаҳон чемпионати финал босқичига чиқа олмагани тасодифми ёки йўқ, деган саволга ўз муносабатини билдирди.
«Ҳеч нарса тасодифан содир бўлмайди. Бу ерда тушунмовчиликлар, омадсизлик бўлди, айрим ҳолларда эса бошқа кўплаб терма жамоалардан кучсизроқ эканимиз маълум бўлди. Бундай ҳолатлар юз бериши мумкин. Аммо Италия ва италияликлар бундай нарсаларга йўл қўйиб беришлари мумкин эмас», — деди Тотти FONtour лойиҳасининг янги сонида.
Италия терма жамоаси — Жаҳон чемпионатининг тўрт карра ғолиби. У сўнгги бор 2006 йилги мундиалда олтин медални қўлга киритган. Шундан сўнг, миллий жамоа 2010 ва 2014 йилларда гуруҳ босқичидаёқ турнирни тарк этган. Кейинчалик эса Италия 2018, 2022 ва 2026 йиллардаги Жаҳон чемпионатларига чиқа олмади.
