Аргентина терма жамоаси собиқ футболчиси Диего Марадонанинг ўғли Лео Мессини отаси билан солиштириб бўлмаслигини айтди.
— Аргентина терма жамоасининг муваффақият сири нимада?
— Бу, шубҳасиз, ажойиб жамоа ва уларнинг етакчиси бор кучи билан ўйнаганида, катта фарқни юзага келтиради. Улар характер, бор кучини бериш ва ғалабага бўлган иштиёқ туфайли жаҳон чемпионати финалига йўл олишди. Бунда Мессининг қўшган ҳиссасидан қатъи назар — гарчи у, шубҳасиз, муҳим ролни ўйнаган бўлса-да — жамоавий руҳ юқори бўлди.
— Ушбу терма жамоа ва отангиз жаҳон чемпиони бўлган 1986 йилги жамоа ўртасида ўхшашлик кўряпсизми?
— Йўқ, чунки Месси атрофида қурилган ҳозирги жамоа отамнинг давридагидан анча кучлироқ. Бу билан отамнинг жамоасини кучсиз демоқчи эмасман, лекин ҳозирги таркиб кучлироқ. Ўхшашликни фақат характерда, ўз ватани шарафини ҳар қандай ҳолатда ҳам ҳимоя қилиш ва миллий терма жамоа либоси учун курашиш иштиёқида кўраман. Аммо, фикримча, бу иккита бутунлай бошқа-бошқа жамоалар.
— Иккала жамоада ҳам ўз футбол даҳоси бор.
— Ҳа, лекин 1986 йилги жамоа ўзга сайёраликка таянган эди, бугунгиси эса инсонлар орасида энг биринчисига суянмоқда. Шунга қарамай, уларнинг иккаласи ҳам ўйин тақдирини ҳал қила оладиган футболчилардир.
— Марадона ва Месси ўртасидаги таққослашлар шу ёзнинг энг кўп муҳокама қилинган мавзуларидан бири бўлди.
— Уларни ўзаро солиштирадиган одам жуда аҳмоқдир ва мен буни бор ҳурматимни сақлаган ҳолда айтяпман. Биринчидан, Мессининг ўзи ҳам бундай таққослаш ноўрин эканлигини, чунки Диего доим биринчи рақамли бўлиб қолишини айтган. Иккинчидан, футбол ўзгарди. Майдонда деярли ҳамма нарсага — оёқ билан тепиш, муштлашиш, қўпол тўқнашувларга рухсат берилган даврда ўйнаган футболчини, оёқ бироз босиб олингани учун ҳам пенальти белгиланиши мумкин бўлган даврдаги футболчи билан қандай солиштириш мумкин? Ва учинчидан, ўзга сайёраликларни инсонлар билан таққослаб бўлмайди.
— Бугун оқшом Месси фаолиятида кетма-кет иккинчи марта жаҳон чемпионати финалида майдонга тушади. Агар у кетма-кет иккинчи титулни қўлга киритса — бу ҳатто отангизга ҳам насиб қилмаган — у Аргентина учун кимга айланади?
— У янада буюк ва севимли шахсга айланади, аммо солиштириш масаласида бу ҳеч нарсани ўзгартирмайди. У хоҳласа ўнта жаҳон чемпионатида ғолиб чиқсин, барибир фарқи йўқ, — деди кичик Марадона.
