Супероғир вазн тоифасида мағлубият нималигини билмай келаётган собиқ мутлақ жаҳон чемпиони, украиналик Александр Усик 2026 йилги жаҳон чемпионати финалида кимга мухлислик қилаётганини маълум қилди.
Испания ва Аргентина терма жамоалари якшанба, 19 июль куни жаҳон чемпионати финалида ўзаро тўқнаш келишади. Ўйин «Метлайф» стадионида (Ист-Ратерфорд, АҚШ) бўлиб ўтади. Учрашувда словениялик Славко Винчич бош ҳакамлик қилади.
«Мен Испаниянинг ғалаба қозонишини хоҳлайман ва ушбу терма жамоага мухлислик қиламан, чунки Португалия мағлуб бўлди, энди эса испанларда ғалаба қозониш учун имконият бор. Испания умуман бошқа даражада ўйин кўрсатмоқда», — дея Усикнинг сўзларини Last Word On Sports портали келтирмоқда.
