«Монако» ва АҚШ терма жамоаси ҳужумчиси Фоларин Балогун фаолиятини Германияда давом эттириши мумкин.

Экрем Конурнинг хабарига кўра, Дортмунднинг «Боруссия» клуби форвардни ўз сафига қўшиб олишдан манфаатдор. «Арилар» америкалик футболчини «Барселона»га ўтишни деярли келишиб олган Карим Адейемига ўринбосар сифатида кўришмоқда.

Фоларин Балогун «Монако»га 2023 йилда «Арсенал»дан 30 миллион евро эвазига ўтган эди. Унинг монегасклар билан шартномаси 2028 йилнинг 30 июнигача мўлжалланган. 2025/26 йилги мавсумда ҳужумчи 43 та ўйин ўтказиб, уларда 19 та гол урди ва бешта голли узатмани амалга оширди. Transfermarkt портали америкалик футболчининг қийматини 40 миллион еврога баҳоламоқда.