Германия терма жамоасининг собиқ ҳужумчиси Марио Гётце Дортмунднинг «Боруссия» клубида бирга ишлашга муваффақ бўлган икки нафар машҳур германиялик мураббий ўртасидаги фарқни шарҳлаб ўтди. Унинг фикрича, улар бир-биридан кескин ажралиб туради.
«Клопп одамларни, ўйинчиларни бошқаришда ва ҳар бир футболчидан ўз имкониятларининг юз фоизини сиқиб чиқаришда идеал эди. Тухель билан эса ҳаммаси бошқача кечган, улар фарқланади. У узоқ муддатли стратегияга урғу берарди ва ўша пайтда клубнинг бутун динамикасини ҳали тўлиқ қабул қилиб улгармаган эди. Лекин тактик жиҳатдан у жуда интеллектли мураббий эди», — дея Гётценинг сўзларини The Athletic келтирмоқда.
Ҳозирда Марио Гётце Франкфуртнинг «Айнтрахт» клуби шарафини ҳимоя қилмоқда.
