Ўзбекистон Суперлигаси 16-туридан ўрин олган «Сурхон» — «Навбаҳор» учрашуви Термизда эмас, Наманган шаҳридаги стадионда бўлиб ўтади. Бу ҳақда Ўзбекистон профессионал футбол лигаси (ЎзПФЛ) матбуот хизмати хабар берди.

Ташкилот томонидан маълум қилинишича, «Сурхон» клуби Суперлига регламенти талабларига мувофиқ ўз вақтида уй ўйинларини ўтказадиган стадион номини тақдим этмаган.

Бундай ҳолат кетма-кет иккинчи бор кузатилмоқда. Аввалроқ 13-турдан ўрин олган «Сурхон» — «Динамо» учрашуви ҳам термизликлар стадион масаласини ўз вақтида ҳал қилмагани сабабли Самарқанддаги «Динамо» стадионига кўчирилган эди. Ваҳоланки, бунга қадар «Сурхон» клуби Термизда рақибларини қабул қила олмаслиги юзасидан Лигага расмий мурожаат йўллаган.

«Суперлига 16-туридан ўрин олган «Сурхон» — «Навбаҳор» учрашуви санасига 20 кундан кам вақт қолган бўлса-да, «Сурхон» ҳозирга қадар ўз уй ўйинларини ўтказиши лозим бўлган стадион номини Лигага тақдим этмади. Ушбу ҳолат ҳамда Намангандаги стадион мавсумга тайёр эканлигидан келиб чиқиб, Лига учрашувни рақиб майдонида ўтказиш бўйича қарор қабул қилишга мажбур бўлди», — дейилади ПФЛ хабарида.

Маълумот учун, Термиздаги стадион нима сабабдан бундай ҳолатга келиб қолгани ПФЛ томонидан алоҳида ўрганилмоқда. Айни вақтда Лиганинг тегишли мутахассисларидан иборат ишчи гуруҳ Термизда бўлиб турибди. Текширув хулосалари бўйича кейинроқ расмий маълумот берилиши кутилмоқда.