«Челси» вингери Алехандро Гарначо «Астон Вилла»га ўтишга яқин турибди. Бирмингемликлар 22 ёшли футболчини «жуда оддий» шартлар бажарилган тақдирда кучга кирадиган мажбурий сотиб олиш ҳуқуқи билан ижарага олишмоқда.

Инсайдер Фабрицио Романонинг маълумотларига кўра, аргентиналик футболчи сўнгги йилларда дуч келган танқид ва масхаралар сабабли Англиядан кетишни режалаштираётган эди. Бироқ «Вилла» бош мураббийи Унаи Эмери футболчини фикридан қайтаришга эришди:

«Биз сенинг карьерангни қайта тиклашга қодирмиз», — деган испаниялик мутахассис футболчига.

Ўтган йилнинг ёзида Алехандро Гарначо «Манчестер Юнайтед»дан «Челси»га 46,2 миллион евро эвазига ўтган эди. Футболчи «кўклар» сафида 43 та ўйинда майдонга тушиб, ўз ҳисобига 8 та гол ва 4 та голли узатма ёзиб қўйган.