Италиянинг «Рома» клуби «Лидс» аъзоси Крисенсио Саммервилл трансфери амалга ошмагач, эътиборини «РБ Лейпциг» вингери Антонио Нусага қаратди. Бу ҳақда Il Corriere dello Sport нашри хабар бермоқда.
Римликлар Норвегия терма жамоаси аъзосини ҳужум чизиғини кучайтириш учун асосий нишон сифатида белгилаб олган. Бироқ Германия клуби қўяётган молиявий талаб трансфер йўлидаги асосий ғов бўлиб турибди — «Лейпциг» 21 ёшли футболчини 55 миллион евродан арзонроққа қўйиб юбормоқчи эмас.
«Рома» спорт директори Тони Д'Амико футболчининг атрофидаги инсонлар билан эҳтимолий трансфер шартларини муҳокама қилишни бошлаган. Римликлар шорт-листидан, шунингдек, Диего Морейра ва Андреас Шельдеруп каби муқобил вариантлар ҳам ўрин олган.
