Германия миллий терма жамоасининг янги бош мураббийи Юрген Клопп тайинловдан кейинги илк фикрлари билан ўртоқлашди.
Клоппнинг бош мураббий сифатидаги сўнгги иш жойи 2015–2024 йилларда бошқарган «Ливерпуль» клуби бўлган. 59 ёшли мутахассис кейинги вақтда «Ред Булл» компаниясининг футбол йўналиши раҳбари лавозимида фаолият юритган эди. Бугун у Германия футбол иттифоқи (DFB) билан тўрт йиллик шартнома имзолагани маълум қилинди.
«Терма жамоа немис халқини бошқа деярли ҳеч нарса қила олмайдиган даражада бирлаштира олади. Шунинг учун ҳам бу вазифа мен учун жуда алоҳида аҳамиятга эга. Сўнгги бир ярим йил давомида “Ред Булл”да орттирган тажрибам ва ўрганган билимларим учун, шунингдек, ушбу келишувга эришиш имконини берган очиқ муносабат учун миннатдорман. Энди эса немис футболидаги бу бетакрор вазифани интиқлик билан кутяпман. Биз камтарлик ва сабр-тоқат билан бир-бири учун курашадиган, ўйиндан завқ оладиган ҳамда мамлакатимиз мухлислари тўла ишонч билан қўллаб-қувватлайдиган жамоани шакллантиришга киришамиз», — деди Клопп DFB расмий сайтига берган интервьюсида.
