«Манчестер Юнайтед» «Болонья» ярим ҳимоячиси Жонатан Роу учун «Эвертон» билан жиддий рақобат олиб бормоқда.
23 ёшли футболчи ўз вақтида амалдаги «Олтин тўп» соҳиби Усмон Дембелега қиёсланган бўлиб, А Сериядаги ёрқин ўйинларидан сўнг АПЛ клублари эътиборини тортди. Corriere di Bologna нашри хабарига кўра, «Болонья» ҳар иккала қанотда ҳам бирдек ҳаракат қила оладиган ушбу универсал футболчи учун тахминан 35 миллион фунт стерлинг олишни режалаштирмоқда. «Эвертон» ҳам Роуга жуда жиддий қизиқиш билдирмоқда.
Британия ва Ямайка фуқаролигига эга бўлган Роу Англиянинг турли ёшдаги терма жамоаларида тўп сурган. У 2025 йилги ёшлар ўртасидаги Европа чемпионатида (U21) асосий қаҳрамонлардан бирига айланиб, Германияга қарши кечган финал ўйинида захирадан майдонга тушган ва жамоасига ғалаба келтирган голга муаллифлик қилган эди.
