Жазоир терма жамоаси ва «Милан» ярим ҳимоячиси Исмаэль Беннасер жамоадан кетишга яқин турибди. Бу ҳақда ижтимоий тармоқлар орқали инсайдер Фабрицио Романо хабар бермоқда.
Манбага маълум бўлишича, томонлар ҳамкорликни муддатидан олдин тўхтатиш бўйича келишиб олишган. Унинг амалдаги шартномаси келаси йилнинг ёзигача мўлжалланган эди. Тез орада алжирлик футболчи эркин агент мақомини олади.
28 ёшли ярим ҳимоячи фаолиятини Катарнинг «Ал-Гарафа» клубида давом эттиради. Томонлар ўртасида трансфер бўйича келишув мавжуд.
Исмаэль 2019 йилнинг ёзидан бери «Милан» футболчиси ҳисобланади. Transfermarkt баҳолашига кўра, унинг бозор қиймати 8 миллион еврони ташкил этади.
