«Штутгарт» бошқарув раиси Александер Верле «Бавария»нинг ҳужумчи Ник Вольтемаде бўйича таклифини масхара қилди.

Ўтган ёзда мюнхенликлар германиялик футболчини ўз сафларига қўшиб олишга ҳаракат қилишган ва ҳатто у билан оғзаки келишувга эришишган эди. Бироқ «Штутгарт» ўйинчини таклиф қилинган 60 миллион еврога сотишдан бош тортган ва камида 75 миллион евро талаб қилган.

«Биз «Бавария»нинг ғашига тегишга ҳаракат қилганимиз йўқ. Шунчаки таклифлардаги фарқ жуда катта эди. Вольтемаде учун улар сариёғли брецелдан салгина қимматроқ нарх таклиф қилишди», — деди Верле клуб аъзоларининг ҳар йилги йиғилишида.

Мутасадди, шунингдек, Германия кубоги финалидаги мухлислар қўллаб-қувватлови борасида ҳам мюнхенликлар устидан пичинг қилди.

«Мен бирорта ҳам «Бавария» мухлисининг овозини эшитмадим», — деди Верле ва стадионда фақат «Штутгарт» фанатларининг овози эшитилганини таъкидлади.