Аргентина терма жамоаси бош мураббийи Лионель Скалони Жаҳон чемпионатидан сўнг мухлисларга мурожаат қилди.
ЖЧ-2026 финалида (19 июль куни) Аргентина Испанияга имкониятни бой берди (0:1, қўшимча вақтда).
«Ғам-андуҳ қувонч билан, ёшлар табассум билан, қалб оғриғи эса хотиржамлик билан қоришиб кетган шиддатли ҳафтадан сўнг, ниҳоят ўтириб бир нечта сўз ёзиш имкониятига эга бўлдим. Мен ижтимоий тармоқларни унча хуш кўрмаслигимни билсангиз-да, эҳтимол, бу фикрларимни сизга етказишнинг энг яхши йўлидир.
Менга фақат сизга яна бир кубокни олиб кела олмаганим ва ҳаётий ташвишларни бир неча кунга бўлса-да унуттирадиган қувончни қайта тақдим эта олмаганим учун кечирим сўраш қолади, холос.
Лекин мен сизнинг футболчилар — аёлимга айтганимдек, менинг жангчиларим билан бирга сизга кўрсатишга ҳаракат қилган нарсаларимизга содиқ қолишингизни хоҳлайман. Меҳнат, иштиёқ, ирода, вазият қанчалик оғир туюлмасин таслим бўлмаслик, қўлингизда ҳеч нарса қолмаганида ҳам бор-будингизни бериш, бизни билмайдиганларнинг совуқ гапларига чидаш, ўз мақсадларингизга эриша олиш ва оёқларингиз мадорсизланганда ҳам тик тура олиш... Мана шу ҳақиқий кубокдир.
Мен ўз мураббийлар штабимдан, футболчилардан, AFA (Аргентина футбол ассоциацияси) ходимларидан, бизга қулайлик яратиб берадиганлардан ва сизнинг ҳар бирингиздан чексиз миннатдорман. Кимнинг аргентиналик дўсти бўлса, демак, унинг қўлида ҳақиқий хазина бор», — деб ёзди Скалони.
