Яқин орада «Манчестер Сити» ҳимоячи Йошко Гвардиол билан шартнома узайтирилганини расман эълон қилиши керак. Журналист Флориан Плеттенберг ижтимоий тармоқларда эксклюзив суратни жойлаштирди — унда Гвардиол ўз агенти билан самолётда ўтирганини кўриш мумкин.
Хабар қилинишича, 24 ёшли Гвардиол «Манчестер Сити» билан 2030/2031 йилги мавсум охиригача мўлжалланган янги битимга имзо чеккан. Плеттенбергнинг қайд этишича, янги келишувда футболчининг маоши сезиларли даражада оширилиши кўзда тутилган.
Йошко Гвардиол 2023 йилнинг ёзида «Манчестер Сити» сафига келиб қўшилган эди. Ўшандан бери хорватиялик ҳимоячи 122 та ўйинда майдонга тушиб, 13 та гол урди ва жамоадошларига 10 та голли узатма етказиб берди.
