«Бавария» «ПСЖ» ҳужумчиси Брэдли Барколанинг «Ливерпуль»га ўтиши мумкинлиги билан боғлиқ вазиятни кузатиб бормоқда. Мюнхен клуби футболчига қизиқиш билдирмоқда ва унинг келажакдаги режаларини билиш мақсадида алоқага чиқишга ҳаракат қилган. Бу ҳақда журналист Кристиан Фальк ўз сайтида хабар бермоқда.

Манбанинг хабарига кўра, ушбу ёзда Барколани сотиб олиш «Бавария» учун жуда қимматлик қилади. Бироқ мерсисайдликларда уни трансфер қилиш учун етарли маблағ мавжуд. Қайд этилишича, агар 23 ёшли футболчи «ПСЖ»да яна бир мавсум қолса, Мюнхен клуби уни кейинроқ сотиб олиши мумкин. Вингернинг амалдаги шартномаси 2028 йилнинг ёзида якунига етади.

Олдинроқ ОАВда «Ливерпуль» Баркола трансфери учун 100 миллион фунт стерлинг (116,55 миллион евро) тўлашга тайёрлиги ҳақида хабар берилган эди.

Ўтган мавсумда «ПСЖ» ҳужумчиси барча мусобақаларда 49 та ўйинда майдонга тушиб, 13 та гол ва 7 та голли узатмага муаллифлик қилди. Transfermarkt портали маълумотларига кўра, футболчининг бозор қиймати 90 миллион еврони ташкил этади.