Ўзбекистон Суперлигасининг 15-туридан ўрин олган навбатдаги учрашув ўз якунига етди. Унда “Бухоро” ўз майдонида пойтахтнинг “Локомотив” жамоасини қабул қилиб, 2:1 ҳисобидаги ғалабани қўлга киритди.

Бухорода кечган учрашув кескин курашларга бой ўтди. Ўйиннинг 16-дақиқасида “Локомотив” аъзоси Александр Шушняр ўз дарвозасига тўп киритиб қўйиб (автогол), мезбонларни ҳисобда олдинга олиб чиқди — 1:0. Бироқ, тошкентликлар бу хатони дарҳол тўғрилашга эришди: орадан атиги икки дақиқа ўтиб, 18-дақиқада Шодиёр Шодибоев мувозанатни тиклашга муваффақ бўлди — 1:1.

Учрашувнинг 35-дақиқасига келиб пойтахтликлар қийин вазиятда қолди. Ҳакам Алексей Козловга қизил карточка кўрсатгач, “Локомотив” майдонда бир киши кам бўлиб қолди. Сон жиҳатдан устунликка эга бўлган “Бухоро” бундан унумли фойдаланди ва танаффусга қадар яна ҳисобда олдинга чиқиб олди: 43-дақиқада Темур Мамасидиқов ўз номига гол ёздириб, жамоасига ғалаба келтирувчи тўпни киритди — 2:1.

Иккинчи бўлимда гарчи меҳмонлар ҳисобни тенглаштиришга ҳаракат қилган бўлса-да, ҳисоб ўзгармай қолди.

Ушбу муҳим ғалабадан сўнг “Бухоро” ўз очколари сонини 26 тага етказиб олди ва турнир жадвалида “ОКМК”ни ортда қолдирган ҳолда пешқадамлар учлигига (3-ўринга) кўтарилиб олди. Сафарда мағлубиятга учраган “Локомотив” эса 22 очко билан жадвалнинг ўрта қисмида қолмоқда.

Ўзбекистон Суперлигаси, 15-тур
“Бухоро” — “Локомотив” 2:1
Голлар: Александр Шушняр (16-автогол), Темур Мамасидиқов (43) — Шодиёр Шодибоев (18)
Четлатиш: Алексей Козлов (35, “Локомотив”)