Суперлига доирасидаги «Андижон» ва «Пахтакор» жамоалари ўртасидаги учрашув дуранг билан якунланди - 1:1. Ушбу ўйиндан сўнг андижонликлар посбони Элдор Адҳамов клуб матбуот хизматига ўз фикрларини билдириб ўтди.
«Ўйин қизил карточкагача тенг курашлар остида ўтди, деб ўйлайман. Уларда ҳам, бизда ҳам ҳужумлар бўлди. Лекин биз учун ижобий тугади. Чунки "Пахтакор"га қарши сафарда ёки уйда бир очко ҳам яхши натижа. Улар чемпионлик учун курашаётган, бой тарихга эга жамоа. Бироқ ўйин бўйича улардан қолишмадик, керак бўлса "Пахтакор" ҳам ҳимояланишга мажбур бўлди», — деди Адҳамов.
Шунингдек, дарвозабон иккинчи бўлим ўрталаридаги ўша хавфли эпизод ва сейв хусусида ҳам тўхталиб ўтди.
«Рақиб футболчиси тўпни узоқ бурчакка тепади, деб ўйлагандим. Аммо у бошқа тарафга йўналтирди, чунки ҳимоячиларимиз ўша томонда эди. Яхшики, омад кулиб боқди ва хавфли зарбани бартараф эта олдик. Лекин бу ҳар бир дарвозабоннинг ўз вазифаси деб ўйлайман, бунда ортиқча ҳеч нарса йўқ», — дея қўшимча қилди посбон.
