Зинедин Зиданнинг Франция терма жамоаси бош мураббийи этиб тайинланиши чипталарга нисбатан мисли кўрилмаган ажиотаж талабини келтириб чиқарди. RMC Sport хабарига кўра, афсонавий мутахассис раҳбарлигидаги миллий терма жамоанинг дастлабки уй учрашувига мўлжалланган барча чипталар бир суткадан камроқ вақт ичида тўлиқ сотиб бўлинган.
Сотувлар 31 июль куни очилгани, бироқ кейинги куниёқ чипта сотиб олишнинг имкони қолмагани таъкидланмоқда. Мураббийнинг дебюти 2 октябрь куни Миллатлар лигаси доирасида бўлиб ўтади ва унда Франция терма жамоаси Италия термасини қабул қилади. Мамлакатнинг бош аренаси «Стад де Франс» сиғими тахминан 80 минг томошабинни ташкил этади.
Франция футбол федерацияси Зидан билан тўрт йиллик шартнома имзоланганини расман эълон қилди. Франциялик мутахассис 2021 йилдан бери ишсиз эди. Бундан олдин у «Реал»ни икки марта: 2016-2018 йилларда ҳамда 2019 йилдан 2021 йилгача бошқарган. Унинг бошқаруви даврида Мадрид клуби 11 та совринни, шу жумладан уч марта Чемпионлар лигаси ғолиблиги унвонини қўлга киритган.
