Франция президенти Эммануэль Макрон Халқаро футбол федерацияси (ФИФА) президенти Джанни Инфантинонинг Жаҳон чемпионати ҳуқуқларининг бир қисмини хусусий инвесторларга сотиш бўйича таклифига қарши чиқди, деб хабар бермоқда L’Équipe.
Нашр маълумотларига кўра, телефон орқали суҳбат чоғида Макрон Инфантинога FIFA Forward Enterprise лойиҳасига рози эмаслигини айтган. Давлат раҳбари «жаҳон футболининг жипслиги зарурлиги» ва «халқаро ҳамжиҳатликни мустаҳкамлаш» муҳимлигини эслатиб ўтган.
Макрон, шунингдек, Европа футбол ассоциациялари иттифоқи (УЕФА) президенти Александер Чеферин билан ҳам музокаралар ўтказиб, ушбу масалада унинг позициясини қўллаб-қувватлашини билдирган.
ФИФА УЕФА ва бошқа футбол ташкилотлари томонидан билдирилган танқидлардан сўнг ўз турнирлари ҳуқуқларининг бир қисмини хусусий инвесторларга сотиш лойиҳасидан воз кечган эди. Бу вазият Инфантинога бўлган босимни оширди ва бир қатор миллий футбол ассоциациялари ўртасида хавотир уйғотди.
