Fransiya prezidenti Emmanuel Makron Xalqaro futbol federasiyasi (FIFA) prezidenti Djanni Infantinoning Jahon chempionati huquqlarining bir qismini xususiy investorlarga sotish bo‘yicha taklifiga qarshi chiqdi, deb xabar bermoqda L’Équipe.

Nashr ma’lumotlariga ko‘ra, telefon orqali suhbat chog‘ida Makron Infantinoga FIFA Forward Enterprise loyihasiga rozi emasligini aytgan. Davlat rahbari «jahon futbolining jipsligi zarurligi» va «xalqaro hamjihatlikni mustahkamlash» muhimligini eslatib o‘tgan.

Makron, shuningdek, Yevropa futbol assosiasiyalari ittifoqi (UYEFA) prezidenti Aleksander Cheferin bilan ham muzokaralar o‘tkazib, ushbu masalada uning pozisiyasini qo‘llab-quvvatlashini bildirgan.

FIFA UYEFA va boshqa futbol tashkilotlari tomonidan bildirilgan tanqidlardan so‘ng o‘z turnirlari huquqlarining bir qismini xususiy investorlarga sotish loyihasidan voz kechgan edi. Bu vaziyat Infantinoga bo‘lgan bosimni oshirdi va bir qator milliy futbol assosiasiyalari o‘rtasida xavotir uyg‘otdi.