ФИФА президенти Жанни Инфантино бугун ўз номзоди атрофида ортиб бораётган босим фонида АҚШ президенти Дональд Трамп администрациясининг қўллаб-қувватлашига эришишга ҳаракат қилади.
The Independent журналисти Мигель Деланининг хабар беришича, Инфантино Трамп кабинети аъзолари билан телефон орқали мулоқот ўтказади. ФИФА раҳбари Америка администрациясидан уни қўллаб-қувватлашни сўраши кутилмоқда.
Сўнгги кунларда Инфантинонинг мавқеи сезиларли даражада заифлашди. Уэльс футбол ассоциацияси ФИФА президентлигига унинг номзодини қўллаб-қувватлашни расман қайтариб олди, Англия футбол ассоциацияси ҳам тегишли хатни тайёрламоқда. Бундан ташқари, УЕФА мусобақаларнинг тижорий ҳуқуқларидаги улушни хусусий инвесторларга сотиш лойиҳаси туфайли ФИФАга қарши суд жараёнини бошлаш имкониятини кўриб чиқмоқда.
