Лондоннинг «Челси» клуби расмий сайти орқали тажрибали ярим ҳимоячи Жордан Ҳендерсон билан шартнома имзоланганини эълон қилди.

36 ёшли англиялик футболчи «Брентфорд»дан «кўклар» сафига ўтди ва клуб билан икки йиллик шартнома тузди.

«Челси» матбуот хизматида шундай дейилади:

«Биз Англия терма жамоаси футболчиси Жордан Ҳендерсон билан шартнома имзоланганини мамнуният билан эълон қиламиз. Фаолияти давомида Премьер-лига ва УЕФА Чемпионлар лигаси каби саккизта совринни қўлга киритган ярим ҳимоячи икки йиллик шартнома имзолади ва 2026/27 йилги мавсум олдидан жамоага қўшилади».

Ҳендерсон «Сандерленд» тарбияланувчиси ҳисобланади. У 2011–2023 йиллар давомида «Ливерпуль» шарафини ҳимоя қилиб, клуб билан бир қатор йирик совринларни қўлга киритган.

Шунингдек, тажрибали ярим ҳимоячи фаолияти давомида «Ковентри Сити», «Ал-Иттифоқ», «Аякс» ва сўнгги клуби «Брентфорд» сафида ҳам тўп сурган.