«Ланс» расмий сайтида «Шарлеруа» ярим ҳимоячиси Яссин Титрауининг трансферини эълон қилди. 23 ёшли жазоирлик футболчи 2031 йилгача мўлжалланган шартнома имзолади.
Трансфер суммаси ошкор қилинмаяпти. Transfermarkt портали футболчининг қийматини 7 миллион еврога баҳоламоқда.
«У жамоамизга босим остида ўйнай олиш ва доимо олдинга интилиш хусусиятини олиб киради. Шахсий фазилатларига тўхталадиган бўлсак, сафимизга жуда камтар ва меҳнаткаш йигит келиб қўшиляпти. Уни яқиндан биладиганлар унинг характерини юқори баҳолайди. 23 ёшида Яссин Жазоир терма жамоасининг, энди эса «Ланс»нинг ҳам келажагини гавдалантиради», — деди клуб спорт директори Жан-Луи Лека.
Ўтган мавсумда Титрауи барча турнирларда 42 та ўйинда майдонга тушиб, 5 та гол урган ва 3 та голли узатмага муаллифлик қилган. ЖЧ-2026 да у Жазоир терма жамоасининг барча ўйинларини захира ўриндиғида ўтказди.
