УЕФА, Осиё футбол конфедерацияси (ОФК) ҳамда Шимолий, Марказий Америка ва Кариб ҳавзаси футбол конфедерацияси (КОНКАКАФ) ФИФА президенти Жанни Инфантино ўз лавозимини тарк этмаса, муқобил халқаро турнирлар ташкил этиш имкониятини кўриб чиқмоқда, деб хабар бермоқда The Times.

Манбанинг хабарига кўра, ушбу учта конфедерация раҳбарлари Инфантинонинг кетгизилишига эришмоқчи ва агар у 2027 йил мартида бўлиб ўтадиган сайловларда тўртинчи муддатга ўз номзодини қўйишга қарор қилса, бир нечта сценарийни тайёрлаб қўйишган. Мумкин бўлган чоралар орасида муқобил мусобақаларни йўлга қўйиш, ФИФА кенгаши йиғилишларига бойкот эълон қилиш ва ташкилот қарорларини тасдиқлашдан бош тортиш бор.

Олдинроқ Инфантино Жаҳон чемпионатининг тижорий ҳуқуқларининг бир қисмини хусусий инвесторларга сотиш ташаббуси билан чиққан, аммо кескин танқидлар тўлқинидан сўнг бу ғоядан воз кечган эди. Лойиҳа ФИФАнинг асосий эркаклар ва аёллар турнирларини бошқариши керак бўлган FIFA Forward Enterprise компаниясини ташкил этишни назарда тутган эди. Ташкилотдагилар бу схема 4,2 миллиард доллар атрофида даромад келтириши мумкинлигини таъкидлашган, бироқ бу ташаббус футбол функционерлари, миллий федерациялар ва бошқа ташкилотлар томонидан қаршиликка учраган.

Инфантино 2016 йилдан бери ФИФАни бошқариб келмоқда. Ташкилот президентининг навбатдаги сайловлари 2027 йилнинг март ойида бўлиб ўтади.