«Галатасарай» ҳужумчиси Виктор Осимхен ёзги трансфер ойнасида Мадриднинг «Атлетико» клубига таклиф қилинган эди. Бу ҳақда Goal портали хабар бермоқда.

27 ёшли футболчининг вакиллари воситачилар орқали «матрасчилар» нигериялик ўйинчи ўтишини тахминан 75 миллион евро эвазига расмийлаштиришлари мумкинлигини билдиришган. Осимхеннинг ўзи Диего Симеоне жамоасига қўшилиш учун маоши камайтирилишига ҳам рози бўлган.

Бироқ «Атлетико» музокараларни давом эттирмади. Клубдагилар ҳозирча бундай битим учун етарли молиявий имкониятларга эга эмасликларини ҳамда марказий ҳужумчи позициясида тўлиқ Хулиан Альваресга таянишларини таъкидлашган.

«Атлетико»дан ташқари, Осимхеннинг хизматлари Европанинг бошқа топ-клубларига, жумладан «Барселона», «Тоттенхэм» ва «Арсенал»га ҳам таклиф қилинган. Ўтган мавсумда нигериялик форвард 33 та ўйинда 22 та гол ва 8 та голли узатмага муаллифлик қилган.