Англия терма жамоасининг собиқ ҳужумчиси Майкл Оуэн вингер Брэдли Барколанинг «ПСЖ»дан «Ливерпуль»га ўтиши мумкинлиги ҳақидаги мавзуда ўз фикрини билдирди.

«У қимматга тушади, аммо «Ливерпуль» нуфузли (мақомли) трансферни амалга оширишига тўғри келади. Илгари булар Салоҳ, Мане ва Луис Диас эди. Ҳозирда ҳужум қанотида ўйнай оладиган бундай даражадаги футболчиларнинг етишмовчилиги сезилмоқда», — деди Оуэн Liverpool Echo'га берган интервьюсида.

Қайд этилишича, «ПСЖ» ўз ўйинчиси учун тахминан 148 миллион евро талаб қилиши мумкин.

«Бир неча ой олдин «Ливерпуль» ўрнида бўлганимда «Вест Ҳэм»дан Жаррод Боуэнни сотиб олишга ҳаракат қилган бўлардим, дегандим. Менга бу жуда мантиқий вариантдек туюлганди. Аммо энди бунинг иложи йўқдек кўринмоқда», — дея қўшимча қилди Оуэн.

Боуэн «Вест Ҳэм» Чемпионшипга тушиб кетганига қарамай, клуб билан шартномани узайтирди.