«Челси»нинг собиқ ярим ҳимоячиси Жон Оби Микел Винисиус Жуниорни «Арсенал»да кутиш керак эмаслигини айтди.

Аввалроқ «Реал» билан шартномани узайтириш бўйича музокаралар олиб бораётган вингерга Лондон клуби қизиқиш билдираётгани ҳақида хабар берилган эди.

«У келмайди! Буни унутинг. У шунчаки «Реал»да манфаатлироқ битимга эришиш учун «Арсенал»дан фойдаланмоқда. У «Реал»ни тарк этмайди. Мен бунга 100 фоиз аминман. У кетмайди! У шунчаки яхшироқ шартнома олиш учун «Арсенал»дан фойдаланмоқчи.

У «Реал»ни тарк этмайди. Унга бунинг нима кераги бор? Қаранг, «Арсенал» — катта жамоа. Агар «Арсенал» катта жамоа эмас десам, ёлғон гапирган бўламан. «Арсенал» — катта жамоа, лекин «Реал» — бу умуман бошқа тарих. Менимча, шартнома ҳақидаги бу гап-сўзлар анчадан бери давом этмоқда», — деди Оби Микел ўз муаллифлигидаги The Obi One Podcast подкастида.