«Мальорка» вингери Жан Виржилининг Бельгиянинг «Брюгге» клубига кутилаётган трансферидан «Барселона» тахминан 4,8 миллион евро даромад олади.

Última Hora манбасига таяниб Mundo Deportivo нашри хабар беришича, 20 ёшли испаниялик футболчининг 12 миллион евролик трансфер суммасидан 40 фоизи Каталония клубига тегишли бўлади.

Бир йил аввал «Барса» Виржилини «Мальорка»га 3,5 миллион еврога сотган эди. Шу тариқа, «блауграна» ўз академик тарбияланувчисининг сотувларидан умумий ҳисобда 8,3 миллион евро ишлаб олади. Эътиборлиси, Виржили «Барселона»нинг асосий жамоаси таркибида бирор марта ҳам майдонга тушмаган.

Виржили учун кечган курашда «Брюгге» шартномадаги 12 миллион евролик товон пулини фаоллаштириб, «Аякс»ни ортда қолдирди. Агар «Мальорка» Сегундага тушиб кетмаганида, футболчининг товон пули 30 миллион еврони ташкил этган бўларди.