Хавьер «Чичарито» Эрнандес Рио Фердинанд билан суҳбатда Криштиану Роналду ҳақидаги таассуротлари билан ўртоқлашди.

Мексикалик ҳужумчи 2014/15 йилги мавсумда «Реал» сафида Роналду билан бирга тўп сурган эди.

— Криштиану Роналду билан бир кийиниш хонасида илк бор кўришганингда таассуротларинг қандай бўлган? Карьерасининг ўша босқичида у қандай инсон эди?

— Бу ажойиб эди. Бунгача мен сен ва жамоадаги бошқа йигитлар билан Криштианунинг «Манчестер Юнайтед»даги даври ҳақида жуда кўп гаплашгандим. Менга кўплаб ҳикояларни айтиб беришганди, кейин эса у билан бир жамоада ўйнаш шарафига муяссар бўлдим. Биласанми, сизлар айтиб берган ўша ҳикояларнинг барчаси ҳақиқат бўлиб чиқди.

У ҳатто кечки овқат пайтида ҳам мусобақалашарди. Лекин бу рақобатбардошликнинг кибр ёки манманликка ҳеч қандай алоқаси йўқ. Гап у ўзининг сендан устунлигини исботламоқчи бўлишида эмас. Шунчаки, менимча, унинг ичида қандайдир ички «мотор» бор. Менимча, бу нарса жуда кўп футболчиларда бор: бизда «ёқилган» ёки «ўчирилган» режими бўлмайди. Сиз ҳар доим «ёқилган» режимда бўласиз.

Энг яхшиларнинг энг яхшиси бўлиш учун ҳар куннинг ҳар бир сониясида энг яхши бўлишинг керак. Фақат шу йўл билангина энг зўри бўлганингда пайдо бўладиган босимга дош бериш мумкин.

Лекин, очиғини айтсам, менда у ҳақда айнан инсон сифатида жуда кўп яхши хотиралар қолган. Сен ҳам мени яхши биласан. Мен Криштиану Роналдудек тинимсиз меҳнат қилганман демоқчи эмасман. Гап бунда эмас. Лекин мен ҳар доим муолажалардан ўтиш ёки тренажёр залида шуғулланиш учун ҳаммадан эрта келадиганлардан эдим.

Агар машғулотдан сўнг спорт залида қўшимча ишлаш ёки бошқа нарса қилиш керак бўлса, мен буни ҳамиша қилардим. Сен буни ўз кўзларинг билан кўргансан. Шу сабабли менда у билан яккама-якка вақт ўтказиш имконияти бўлган. Ва ҳоли қолганимизда у умуман кибрли одам эмас эди, — деди Чичарито.