«Манчестер Юнайтед» шу ёзда академиянинг камида уч нафар тарбияланувчиси билан тўлиқ хайрлашишга ва U-21 жамоасининг катта қисмини ижарага юборишга тайёрланмоқда.

Дэн Гор, Тоби Коллиер ва Ҳарри Амасс жамоадан кетиши кутилаётган асосий номзодлар ҳисобланади. Жейкоб Девани ва Чидо Оби эса ижарага берилиши мумкин. «МЮ» билан шартномаси якунланиб бораётган 19 ёшли Амасс учун Чемпионшип клублари тахминан 6 миллион фунт тўлашга тайёр.

21 ёшли Дэн Гор ўтган мавсумда «Ротерҳэм Юнайтед»да ижарада муваффақиятли ҳаракат қилган бўлса-да, «МЮ»нинг асосий таркибидаги ягона расмий ўйинини 2023 йилнинг сентябрида «Кристал Пэлас»га қарши ўтказган эди.

Шунингдек, чехиялик дарвозабон Радек Витек 7 миллион фунт эвазига «Мидлсбро»га ўтишга яқин турибди.

Клубда фақат Ши Лейси, Жей Жей Габриэль ҳамда ака-ука Флетчерлар каби энг иқтидорли ёшларгина «дахлсиз» сифатида сақлаб қолинади.