«Манчестер Юнайтед» ва «Реал Мадрид» клубларининг собиқ ҳужумчиси Хавьер Эрнандес (Чичарито) Рио Фердинанднинг «Rio Ferdinand Presents» подкастида меҳмон бўлиб, «Манчестер Сити» форварди Эрлинг Холанднинг тўпсиз ҳаракатланиши ва потенциали ҳақида атрофлича фикр юритди.

Тажрибали мексикалик собиқ футболчининг таъкидлашича, норвегиялик ҳужумчи ҳозирда жаҳоннинг энг хавфли тўпурарларидан бири бўлса-да, унинг ўйинида шаклланиши лозим бўлган жиҳатлар ҳали ҳам мавжуд.

"У ҳали мукаммал ҳаракат қилмайди. Холандга янада мураккаб, икки босқичли тўпсиз ҳаракатларни қўшишни тасаввур қилиб кўринг.

Тўғри, унга бу нарса ҳозирча шарт ҳам эмас, чунки Эрлинг — ҳақиқий "йўлбарс". У ҳозирнинг ўзида жуда кўп нарсани тўғри бажармоқда.

Аммо тезкор ва жисмонан бақувват футболчилар кўпинча майдондаги футбол ақлига камроқ суянадилар, чунки уларга бунинг зарурати бўлмайди. Қачонки тезлик ёки жисмоний куч пасая бошлаганида, бошқа йўллар билан устунликка эришиш ҳақида ўйлашга мажбур бўласиз.

Шу сабабли менга Холанд ҳали ҳам янада кучайишга қодирдек туюлади. Ҳозир у ажойиб, аммо ўсиш учун катта имконият бор. Ўйлашимча, у келажакда ҳақиқий феноменга айланиши мумкин", — деди Чичарито.