Хоакин Корреа қадрдон «Эстудиантес» клубига қайтди.

«Интер»нинг собиқ ҳужумчиси Хоакин Корреа «Ботафого»дан «Эстудиантес»га ўтди. 31 ёшли аргентиналик футболчи ўзи тарбияланган клуб билан икки йиллик шартнома имзолади.

Ҳужумчи клубнинг асосий жамоасида 2012 йилда дебют қилган ва у ерда уч мавсум ўтказган. Европада Корреа «Севилья», «Лацио», «Интер», «Марсель» ва «Сампдория» клубларида тўп сурган.

«Лацио» таркибида у Италия Кубоги ва Суперкубогини, «Интер»да эса иккитадан Италия Кубоги ва Суперкубогини қўлга киритган. Аргентина терма жамоаси билан Хоакин 2021 йилги Америка Кубогида зафар қучган.