«Барселона» ва Испания терма жамоасининг собиқ ярим ҳимоячиси Серхи Роберто фаолиятини MLS'да давом эттиради. 34 ёшли футболчи «Лос-Анджелес Гэлакси» билан 2028 йилнинг 30 июнигача мўлжалланган ва яна бир мавсумга узайтириш опциясига эга бўлган шартнома имзолади, деб хабар беради клуб расмий сайти.

Роберто Италиянинг «Комо» клубидаги икки йиллик фаолиятидан сўнг Америка жамоасига эркин агент сифатида келиб қўшилади. 2025/26 йилги мавсумда у Сеск Фабрегас жамоасига ўз тарихида илк бор Чемпионлар Лигасига йўлланма олишда ёрдам берди. Испаниялик футболчи «Комо» таркибида барча турнирларда 37 та ўйин ўтказиб, 1 та гол ва 1 та голли узатмага муаллифлик қилди.

Роберто фаолиятининг асосий қисмини ўзи тарбиялангани «Барселона» клубида ўтказган. У асосий жамоада 2010 йилда дебют қилган ва кейинчалик 373 та ўйинда майдонга тушиб, 19 та гол урган. 2023/24 йилги мавсумда испаниялик футболчи Каталония клуби сардори бўлган.

«Барселона» таркибида Роберто 7 марта Испания чемпиони бўлган, 6 марта Испания Кубогини ва 2 марта Чемпионлар Лигасини қўлга киритган. Испания терма жамоаси сафида эса Роберто 11 та ўйин ўтказиб, 1 та гол урган.