«Barselona» va Ispaniya terma jamoasining sobiq yarim himoyachisi Serxi Roberto faoliyatini MLS'da davom ettiradi. 34 yoshli futbolchi «Los-Andjeles Gelaksi» bilan 2028 yilning 30 iyunigacha mo‘ljallangan va yana bir mavsumga uzaytirish opsiyasiga ega bo‘lgan shartnoma imzoladi, deb xabar beradi klub rasmiy sayti.

Roberto Italiyaning «Komo» klubidagi ikki yillik faoliyatidan so‘ng Amerika jamoasiga erkin agent sifatida kelib qo‘shiladi. 2025/26 yilgi mavsumda u Sesk Fabregas jamoasiga o‘z tarixida ilk bor Chempionlar Ligasiga yo‘llanma olishda yordam berdi. Ispaniyalik futbolchi «Komo» tarkibida barcha turnirlarda 37 ta o‘yin o‘tkazib, 1 ta gol va 1 ta golli uzatmaga mualliflik qildi.

Roberto faoliyatining asosiy qismini o‘zi tarbiyalangani «Barselona» klubida o‘tkazgan. U asosiy jamoada 2010 yilda debyut qilgan va keyinchalik 373 ta o‘yinda maydonga tushib, 19 ta gol urgan. 2023/24 yilgi mavsumda ispaniyalik futbolchi Kataloniya klubi sardori bo‘lgan.

«Barselona» tarkibida Roberto 7 marta Ispaniya chempioni bo‘lgan, 6 marta Ispaniya Kubogini va 2 marta Chempionlar Ligasini qo‘lga kiritgan. Ispaniya terma jamoasi safida esa Roberto 11 ta o‘yin o‘tkazib, 1 ta gol urgan.