Миланнинг «Интер» клуби «Тоттенҳэм» ҳимоячиси Кристиан Ромерони трансфер қилишга ҳаракат қилмоқда. Бу ҳақда Foot Mercato хабар берди.

Маълумотларга кўра, италиялик клуб «Тоттенҳэм» билан 27 ёшли аргентиналик футболчининг трансфери бўйича 40 млн евро миқдорида келишувга эришган. Бироқ битим ҳозирча футболчининг шахсий шартлари туфайли амалга ошмаяпти.

Ромеро «Интер»дан йилига камида 6 млн евро маош талаб қилмоқда. Айни вақтда бу трансфердаги асосий тўсиқ бўлиб турибди.

Ромерога «Атлетико» ҳам қизиқиш билдирмоқда. Шунга қарамай, «Интер» футболчини Италия чемпионатига қайтишга кўндиришга ҳаракат қилмоқда.

Хабарларга кўра, «Интер» вице-президенти Хавьер Дзанетти ва жамоа ҳужумчиси Лаутаро Мартинес Ромеро билан шахсан боғланиб, уни «Интер»ни танлашга ишонтиришга уринган.

Кристиан Ромеро аввал Италия чемпионатида «Аталанта» ва «Женоа» клублари сафида тўп сурган.