«Ливерпуль»нинг собиқ ҳужумчиси Майкл Оуэн Брэдли Барколянинг мумкин бўлган трансфери ҳақида ўз фикрларини билдирди.

Мерсисайдликлар «ПСЖ» вингери билан шахсий шартнома шартларини келишиб олишгани ва футболчи учун 115 миллион евро атрофида таклиф қилишга тайёрликлари ҳақида хабарлар тарқалган эди. Аммо парижликлар ёш футболчини 150 миллион евродан ортиқроққа баҳолашмоқда.

«У, шубҳасиз, жуда яхши ўйинчи, лекин у учун жуда катта маблағ тўлашга тўғри келади. Клуб ушбу битимни ҳар қандай эвазига якунлаши шарт деб ўйламайман. Дунёда бошқа ажойиб футболчилар ҳам бор.

Биласизми, агар бир неча ой олдин «Ливерпуль» ўрнида бўлганимда нима қилган бўлардим? Мен Жеррод Боуэнни сотиб олиш учун бор имкониятимни ишга солардим. Унинг «Вест Хэм» билан Чемпионшипда ўйнашни жуда хоҳлаётганига ишониш қийин. Лекин ҳозирги ҳолат шундайга ўхшайди. Бу Салахнинг ўрнини босиш учун жуда яхши қадам бўлиши мумкин эди.

Барколя — олий даражадаги футболчи, аммо у жуда қимматга тушади. Албатта, дунё бўйлаб бошқа ажойиб ўйинчилар ҳам топилади. Кўриниб турибдики, жамоага иқтидорли қанот футболчилари сув ва ҳаводек зарур. Бундай ўйинчиларни топиш доим ҳам осон кечмайди. Агар у очиқ трансферда бўлса ва юқори нархини ҳисобга олмасак, битимни амалга ошириш осон бўлса, ҳа, «Ливерпуль» уни қўлга киритишга ҳаракат қилишини тушунишим мумкин», — дейди Оуэн.