«Атлетико» Сеулдаги мавсумлароро сафардан сўнг берилган икки кунлик дам олишдан кейин яна ишга қайтди. Хулиан Альварес барча жамоадошлари ва Диего Симеоне билан қайта бирлашди, деб ёзади Mundo Deportivo.

Кун кеча жамоани тарк этишни истаётган аргентиналик ҳужумчи клуб қароргоҳига қайтгани ва вазиятни Диего Симеоне билан муҳокама қилмоқчи бўлгани, аммо бунинг иложи бўлмагани ҳақида хабар берилган эди – бош мураббий Ибицага икки кунга учиб кетган эди. Футболчи мураббийда муаммони ҳал қилиш ва у билан гаплашиш учун «жасорат етмади» деб ҳисоблаши таъкидланган эди. Бундан ташқари, у машғулот базасидаги барчага унга умид боғламасликларини айтган. У «Барса»га ўтишни хоҳлайди ва ўз сўзида туришини маълум қилган.

Бугун эса жамоанинг машғулоти бўлиб ўтди, унинг 15 дақиқаси ОАВ учун очиқ эди.

Қайд этилишича, Хулиан «бироз ёлғиз» кўринган ва фақат Тома Лемар билан гаплашган. Шу билан бирга, Коке, Алекс Баэна ва Маркос Льоренте жамоадошига қаратилган камераларга эътибор бермай ҳазил-мутойиба қилиб туришган.

Шунингдек, Симеоне тактик машғулотлар пайтида Альваресни асосий таркиб гуруҳига жойлаштирди. Аргентиналик футболчи ҳужумларни ривожлантириш машқлари учун тузилган жамоалардан бирида Лемар билан жуфтлик ҳосил қилди.