«Астон Вилла» ҳужумчиси Эмилиано Буэндия УЕФА Суперкубоги учун «ПСЖ»га қарши ўтказилган ва 1:2 ҳисобидаги мағлубият билан якунланган учрашувдан сўнг фикр билдирди.
«Мағлубиятнинг таъми аччиқ, аммо бугун қандай ўйнаганимиз билан фахрланишимиз мумкин, деб ўйлайман. Биз жуда яхши курашдик. Яхшироқ натижага эришишимиз ҳам мумкин эди. Бизда имкониятлар бўлди. Аммо «ПСЖ» сафида юқори савияли футболчилар бор. Улар ўз имкониятларини қўлдан бой бермайди. Улар гол урди ва ўйинда ғалаба қозонди.
Менимча, биз жуда яхши курашдик. Ҳисобда ортда бораётган пайтимизда вазиятни ўзгартириш осон бўлмади. Биринчи бўлим охирида ҳужумкор ўйнадик ва бир нечта яхши вазиятлар яратдик. Брайан жуда чиройли гол урди, шунинг учун танаффусга ўз кучимизга ишонган ҳолда чиқдик. Иккинчи бўлимда ҳам характер кўрсата олдик», — дея Буэндиянинг сўзларини УЕФА расмий сайти келтирди.
