Лондоннинг «Арсенал» клуби вингери Габриэл Мартинеллининг «Галатасарой»га ўтиши амалга ошмаслиги мумкин.
Туркия клуби бразилиялик футболчи учун оғзаки равишда 45 миллион евролик таклиф билдирди. Журналист Сами Мокбелнинг хабар беришича, 25 ёшли футболчининг ўзи бу битимга унчалик қизиқиш билдирмаяпти. Яқинда «ПСЖ» ҳам ушбу ўйинчига қизиқиш билдирган эди, бироқ Париж гранди якунда бошқа номзодларга эътибор қаратди.
Габриэл Мартинеллининг бозор қиймати Transfermarkt портали томонидан айнан 45 миллион еврога баҳоланмоқда. Бразилия терма жамоаси футболчисининг «канонирлар» билан амалдаги шартномаси 2027 йилнинг ёзигача мўлжалланган бўлиб, у яна бир йилга автоматик узайтирилиши мумкин.
