«Челси» ва «Кристал Пэлас» клублари ҳимоячи Аксель Дисасининг эҳтимолий трансферини муҳокама қилишда давом этмоқда.

Журналист Санти Аунанинг маълумотига кўра, Лондон клуби франциялик футболчини сотиб олиш ҳуқуқисиз, 5 миллион евро эвазига ижарага қўйиб юборишга тайёр.

«Кристал Пэлас» эса «Челси»нинг молиявий талабларини ҳаддан ташқари юқори деб ҳисобламоқда, шу сабабли томонлар ҳозирча келишув шартлари бўйича бир тўхтамга келишгани йўқ. Шу билан бирга, музокаралар жараёни тўхтатилгани йўқ.

Ҳар иккала клуб вакиллари яқин кунларда трансфер муҳокамасига қайтишлари кутилмоқда.

Дисаси «Челси»га 2023 йилда «Монако»дан келиб қўшилган эди. Ўшандан бери у «кўклар» сафида 61 та ўйин ўтказиб, 3 та гол урди ва 2 та голли узатмага муаллифлик қилди. Шунингдек, футболчи ижара асосида «Астон Вилла» ва «Вест Ҳэм» клубларида ҳам тўп сурган.