«Барселона» ва «Манчестер Сити» Родрининг трансфери бўйича келишувга яқинлашмоқда, айни вақтда икки клуб ўртасида фақат 10 миллион евро фарқ қолмоқда.

MARCA нашри хабарига кўра, «Барселона»нинг сўнгги таклифи 70 миллион еврони ташкил этади, бундан 60 миллион евро кафолатланган тўлов ва яна 10 миллион евро бонуслар кўринишида. Бироқ «Манчестер Сити» умумий ҳисобда 80 миллион евро талаб қилмоқда.

Ўртадаги фарқга қарамай, ҳар иккала томон ҳам яқин кунларда келишувга эришиш мумкинлигига оптимистик руҳда қарамоқда. Спорт директорлари Деку ва Уго Виана музокараларни давом эттиришмоқда.

Якшанба куни музокаралар бироз секинлашиши мумкин, чунки иккала жамоанинг ҳам ўйинлари бор — «Манчестер Сити» расмий баҳсда, «Барселона» эса ўртоқлик матчида майдонга тушади. Агар якуний келишувга эришилмаса, клублар музокараларни дўшанба куни қайта бошлашлари кутилмоқда.

Родрининг «Барселона»га ўтиш хоҳиши музокараларнинг марказий омили бўлмоқда. Хабарларга кўра, ярим ҳимоячи «Барселона» ва «Манчестер Сити» ўртасидаги музокаралар бошланишидан аввал «Реал Мадрид»га ўтиш имкониятини рад этган.

Каталония клуби битимни якунлаш учун энди қолган 10 миллион еврони топиши керак бўлади.