Инсайдер Фабрицио Романонинг хабарига кўра, «Ювентус» «Астон Вилла» ва Аргентина терма жамоаси дарвозабони Эмилиано Мартинесни сотиб олиш фикридан қайтган.

Туринликлар 33 ёшли посбоннинг бармоғидаги муаммолардан хабар топгач, уни 6-7 миллион евро атрофидаги арзонлаштирилган нархда қўлга киритишга умид қилишган эди. Улар «Астон Вилла» ушбу жароҳат сабабли ён бериши керак деб ҳисоблашган, аммо Бирмингем клуби бу шартларга рози бўлмади ва битимни рад этди. «Ювентус» эса бундан ортиқ маблағ тўлашга тайёр эмас эди.

Мартинеснинг ўзи Италия гранди сафига ўтишни хоҳлаган. У Жаҳон чемпионати олдидан бармоғини синдириб олган, аммо операциядан бош тортгани сабабли оғриқлар ҳалигача сақланиб қолмоқда. Яқин орада футболчи барибир хирургик амалиётга рози бўлиши мумкинлиги харидорларни чўчитмоқда.