«Манчестер Сити»нинг 32 ёшли ярим ҳимоячиси Матео Ковачич жамоадаги мақоми ва етакчилик роли ҳақида фикр билдирди.

Хорватиялик футболчининг таъкидлашича, у ҳозир «шаҳарликлар» таркибидаги энг тажрибали ўйинчилардан бири ҳисобланади ва майдонда жамоа етакчиларидан бири бўлишга интилади.

«Ҳозир мен «Манчестер Сити»даги энг катта ёшли футболчилардан бириман. Албатта, етакчилардан бири бўлиш ёқимли. Мен майдонда етакчи бўлишга ҳаракат қиламан, аммо жамоамизда Рубен Диаш ва Эрлинг Холанд каби ажойиб футболчилар ҳам бор», — дея Ковачичнинг сўзларини клуб матбуот хизмати келтирди.

Аввалроқ «Манчестер Сити» Англия Суперкубоги учун баҳсда «Арсенал»га 0:3 ҳисобида йирик мағлубиятга учраган эди. Ковачич учрашувни асосий таркибда бошлаб, 79 дақиқа майдонда ҳаракат қилди.

«Манчестер Сити» Англия Премьер-лигасининг янги мавсуми биринчи турида 23 август куни ўз майдонида «Борнмут»ни қабул қилади.