«Барселона» ҳужумчи Виктор Дьёкереш трансфери юзасидан ҳозирча «Арсенал» билан алоқага чиқмаган. Бу ҳақда инсайдер Фабрицио Романо маълум қилди.

Унинг сўзларига кўра, турли хабарларда швециялик футболчининг «Камп Ноу»га кўчиб ўтиши мумкинлиги айтилган бўлса-да, клублар ўртасида қўнғироқлар, тўғридан тўғри мулоқот ёки расмий музокаралар бўлмаган.

«Барселона» Дьёкерешни асосий трансфер мақсади Хулиан Альваресга муқобил номзодлардан бири сифатида кўриб чиқмоқда. Бироқ «Атлетико» ўз етакчисини сотишни истамаётгани сабабли аргентиналик ҳужумчининг трансферини амалга ошириш жуда мураккаб бўлиб қолмоқда.

Роберт Левандовски ва Ферран Торрес жамоани тарк этгач, Ҳанси Флик ихтиёрида тажрибали марказий ҳужумчига эҳтиёж пайдо бўлди. Шу боис трансфер ойнаси ёпилишига қадар айнан шу позицияни кучайтириш клубнинг устувор вазифаларидан бири ҳисобланади.

Дьёкерешни сотиб олиш ҳам катта маблағ талаб қилади. 28 ёшли футболчи ўтган мавсум «Арсенал» сафида 55 та учрашувда майдонга тушиб, 21 та гол урди. Лондон клуби бош мураббийи Микель Артета аввалроқ ҳужумчи жамоада қолишини айтган. Шу сабабли «Арсенал» унинг кетишига осонликча рози бўлиши кутилмаяпти.