Дортмунднинг «Боруссия»си Саид Эл-Мала трансфери учун курашдан чиққанидан сўнг, «Кёльн»нинг 19 ёшли ҳужумчисига «Лейпциг» қизиқиш билдирмоқда. Бу ҳақда Bild хабар берди.
Манбага кўра, Эл-Мала анчадан бери саксонияликлар трансфер рўйхатидан жой олган. «Лейпциг» жорий ҳафтада футболчи учун расмий таклиф юбориш ёки юбормаслик бўйича қарор қабул қилади.
Ҳозирча клублар ўртасида расмий музокаралар бошланмаган. Бироқ «Лейпциг» 50 млн евро кафолатланган тўлов, осон амалга ошадиган шартлар учун 5 млн евро ва алоҳида юқори натижалар учун яна 5 млн евролик бонусларни ўз ичига олган таклиф тайёрламоқда. Шунингдек, «Кёльн»га футболчининг кейинги трансферидан маълум улуш ажратилиши мумкин.
Таклифнинг умумий қиймати 60 млн еврогача етади. Бундай йирик сармояни амалга ошириш учун «Лейпциг» кузатув кенгашининг розилиги талаб этилади.
Bild'га кўра, Эл-Маланинг ўзи «Лейпциг»га кўчиб ўтишга тайёр. Футболчи ўтган пайшанбадаёқ «Кёльн» кийиниш хонасида эҳтимолий трансфер ҳақида гапирган. Бу Дортмунд клубининг якуний таклифи келиб тушишидан ҳам аввал содир бўлган.
«Лейпциг» янги ҳужумкор футболчи учун икки асосий номзодни кўриб чиқмоқда. Эл-Маладан ташқари, «Страсбур» вингери Диегу Морейра ҳам рўйхатда бор. Франция клуби 22 ёшли бельгиялик учун 60–70 млн евро талаб қилмоқда.
«Кёльн»да ҳозирча Эл-Мала жамоада қолишига ишонишмоқда. Футболчининг шартномаси 2030 йилгача амал қилади ва унда белгиланган товон пули мавжуд эмас. Клуб фақат фавқулодда юқори таклиф келган тақдирдагина уни сотишни кўриб чиқади.
Трансфер учун аниқ муддат белгиланмаган. Бироқ 1 сентябр — ёзги трансфер ойнасининг сўнгги куни яқинлашган сари «Кёльн» Эл-Мала учун янада кўпроқ маблағ талаб қилиши мумкин.
