«Валенсия» «Ливерпул» қанот ҳужумчиси Федерико Кьезага қизиқиш билдирмоқда. Испаниялик журналист Фран Гуайтанинг хабар беришича, клуб футболчининг трансфер шартларини билиш учун мерсисайдликларга расмий сўров юборган.

Испания клуби трансферлар ойнасининг сўнгги қисмида ҳужум чизиғига юқори савияли футболчи қўшишни режалаштирган. «Валенсия» раҳбарияти жамоа ўйинига дарҳол таъсир кўрсата оладиган ва мухлисларда қизиқиш уйғотадиган номзод изламоқда.

Кьеза «Ливерпуль» сафига «Ювентус»дан тахминан 10 млн фунт эвазига келиб қўшилганди. Бироқ италиялик футболчи «Энфилд»да асосий таркибдан муқим жой эгаллай олмади ва кўпинча захирадан майдонга тушди.

Собиқ бош мураббий Арне Слот даврида ҳужум чизиғидаги кучли рақобат Кьезанинг мунтазам ўйин амалиётига эга бўлишига тўсқинлик қилди. Янги мураббий Андони Ираола эса 29 ёшли вингерга ўзини яна бир бор кўрсатиш имкониятини бермоқда.

Ҳозирча Кьезанинг «Ливерпул»дан кетишга тайёр ёки тайёр эмаслиги номаълум. «Валенсия» эса футболчи жамоасини алмаштиришга қарор қилса, унинг асосий вариантларидан бири бўлиши мумкин. Томонлар ўртасида ҳозирча расмий музокара ёки трансфер таклифи ҳақида хабар берилмаган.