"Ливерпуль" "ПСЖ" вингери Ибраҳим Мбайе билан шахсий шартнома шартлари бўйича келишувга эришди. Бу ҳақда журналист Фабрис Ҳоукинс хабар берди.
Манба маълумотига кўра, томонлар 5 йиллик шартноманинг молиявий шартларини келишиб олган. 18 ёшли футболчига "Байер" ҳам қизиқиш билдирган, аммо Мбайе "Ливерпуль" вариантини танлаган ва Бундеслига клубига ўтиш ниятида эмас.
"Қизиллар" ҳужум чизиғини кучайтириш режаси доирасида Мбайе трансфери устида ишламоқда. Шу билан бирга, мерсисайдликлар "ПСЖ"нинг яна бир вингери Брадли Барколани ҳам ўз сафига қўшиб олиш ҳаракатини давом эттирмоқда.
Мбайенинг Париж клуби билан амалдаги шартномаси 2028 йил ёзига қадар мўлжалланган. Шу сабаб "ПСЖ" музокараларда кучли позицияга эга.
18 ёшли вингер ёш бўлишига қарамай, "ПСЖ" асосий жамоаси сафида барча мусобақалар доирасида 42 та учрашув ўтказиб, 4 та гол урди ва 4 та голли узатмани амалга оширди.
Энди "Ливерпуль" "ПСЖ" билан Мбайе ва Брадли Баркола трансферлари бўйича музокараларни давом эттириши кутилмоқда. Англия клуби икки футболчини ҳам бир вақтда харид қилиш имкониятини кўриб чиқмоқда.
Бироқ ҳозирча клублар ҳар икки вингернинг трансфер қиймати бўйича келишувга эришмаган ва битимлар расмийлаштирилмаган.
