ОФК Чемпионлар лигаси 2 мусобақасининг 2026/27 йилги мавсуми гуруҳ босқичига қуръа ташланди. Ўзбекистоннинг "Насаф" клуби "А" гуруҳидан жой олди.
Қарши жамоаси гуруҳ босқичида Бирлашган Араб Амирликларининг "Ал-Ваҳда", Кувайтнинг "Кувайт СК" ҳамда Баҳрайннинг "Ал-Халдия" клубларига қарши баҳс олиб боради.
"А" гуруҳи:
- "Ал-Ваҳда" (БАА)
- "Насаф" (Ўзбекистон)
- "Кувайт СК" (Кувайт)
- "Ал-Халдия" (Баҳрайн)
Қуръа маросими 18 август куни Малайзия пойтахти Куала-Лумпурда ўтказилди. ОФК маълумотига кўра, мусобақанинг гуруҳ босқичида жами 32 та клуб иштирок этади. Улар тўрттадан саккиз гуруҳга ажратилади — Ғарб минтақасида тўртта ва Шарқ минтақасида тўртта гуруҳ шакллантирилган.
Гуруҳ босқичи учрашувлари 15 сентябрдан бошланади. Ҳар бир жамоа ўз гуруҳидаги уч рақиб билан уй ва сафарда ўйнайди. Шу тариқа, "Насаф" гуруҳ босқичида жами 6 та учрашув ўтказади. Гуруҳда биринчи ва иккинчи ўринни эгаллаган жамоалар нимчорак финалга йўл олади.
2026/27 йилги мавсум ОФК клуб мусобақалари ислоҳ қилинганидан кейинги Чемпионлар лигаси 2нинг учинчи мавсуми ҳисобланади. Илк мавсумда БААнинг "Шаржа" клуби чемпион бўлган бўлса, 2025/26 йилги турнирда Япониянинг "Гамба Осака" жамоаси бош совринни қўлга киритган.
Мусобақада молиявий рағбат ҳам салмоқли. ОФК регламентига кўра, гуруҳ босқичида иштирок этган ҳар бир клуб 300 минг доллар олади, ҳар бир ғалаба учун эса қўшимча 50 минг доллардан мукофот пули берилади. Чемпионга 2,5 млн доллар, финалда мағлуб бўлган жамоага эса 1 млн доллар мукофот белгиланган.
Шу тариқа, "Насаф" плей-офф босқичига чиқиш учун БАА, Кувайт ва Баҳрайннинг кучли клубларига қарши кураш олиб боради.
